Chegou, forte, empurrando ó frío portador de virus e demais alimañas invernais, si, chegou a florida primavera traendo canda si arrecendos  novos, de primeiro tempo- que din os gavachos. Chegou acompañada de ventos saharianos, con temperaturas que poucos recordan neste mes de abril das augas mil.

Atópanse perdidos os vexetais enganados por unha temperatura fora de lugar e florecen, votan follas ou flores pensando que xa pasou o inverno sen saber, que segundo o saber popular que algo sabe, este é mes de ventos fríos, de choiva  torrencial de  neves traidoras que acurtan a vida das preciosas flores temperás, aquelas que confían na bondade universal.

Cantan bubelas esperando atopar a parella que será axuda pra sacar a nova camada. Pegas e demais compañeiros alados traballan a reo nos enormes niños que serán fogar dos novos grumos. Bule a vida baixo este sol de xustiza acompañado dos poucos labregos que saben valorar a fermosura do natural, das pequenas cousas que asemellan milagres, o surxír da terra daquelas pequenas follas que serán manxar no verán, que un día quitaron fames atrasadas. Benvida primavera.